Guets tägli, saletti Spaghetti, wie henders? Do esch de Globi juhuu!

Wo ech mine Frönde höt bim brötle vo mine vergangene Abentüür verzellt ha, hend die doch gar ned gwösst wo die Ort eigentlech send. Drom hemmer üs grad uf d’Reis gmacht dör üsi Schwiiz.

Zerscht semmer det äne wo d’Natur am schönschte esch, wär hätts dänkt? Genau, is Entlebuch. Wo mer üs de guet ih de Natur erholt hend semmer de wiiters ih d’Stadt Lozärn, is Hotel Schwiizerhof. Ujujuj das hed au vell lüüt do! Nochdem mer üsi Zimmer bezoge hend semmer alli zäme go Lasagne ässe. Mmmhhh esch das fein gsi!

Mer hend sogar ghört, dass do en Disco esch wo mer üse Start vo de Reis so rechtig chönd fiire.Ehr glaubid ned wär ech det ahtroffe ha, nämlech de neu Schwingerkönig Joel Wicki. Zäme hemmer bis spot ih d’Nacht üsi neuste Dance-Moves zeigt.

Tageszitat: "De Wicki Joel esch jo wörklech en starche (ond schöne, hehehe), sogar de Globi esch öberwältigt gsi!"  9 Kl. Mädchen 

Höt hani mech am haubi achti uf de Wäg gmacht i Kanton Bern. Dete esch mer scho glii en alti Dame met emene rüüdig döretreite Outfit entgäge z’sprenge cho. Sie esch ganz närvös zo mer cho ond hed mer verzellt, dass sie en Bankräuber gseh hed zo de Nationalbank schliiche. Das hani natürli ned welle glaube aber ech loh secher ned zue dass üses Schwiizer Gold gstohle werd, uf gar kei Fall! Ond tatsächlech, woni bide Nationalbank acho be esch scho s'Secherheitssyschtem usgfalle.

Met de Helf vo mine Frönde hemmers gschafft s Sicherheitssystem z stärke ond somit en Grossteil vom Gold z rette. Leider hemmer aber ned alles Gold chönne secherstelle. De Bankräuber hed no Gold vo de Nationalbank chönne chlaue ond esch de i Bäregrabe gflöchtet. Det hemmerne chönne id Falle locke ond s'räschtleche Gold zrogbrenge.

Nochere gloschtige bärner Gärschtesoppe hemmer de Obe im Stadttheater bimene Musical lo usklenge. Du gloubsch gar ned wienech gschmonzlet ha wo de Beno Hueber d W.Nuss vo Bümpliz zom beschte gä hed.

Nochdem aschträngende Tag hani mech rechtig gfreut of s'Bett ond be grad ipfuused!

Tageszitat: "Dä Tag esch Goudwärt gseh"  7 Kl. Mädchen

Salamander metenander! Do esch weder üche Globi

Ech mälde mech höt usem Wallis. Ond zwor hani wölle go de Sonneuufgang aluege. Drom beni am Morgefrüeh z Grimentz is Bähnli igstege ond uf de Bärg Bendolla gfahre. Ond sapperlot esch das Morgerot schön gseh! Sone tolle Ahbleck hani scho lang nömm gseh.

Wöus mer so gfalle hed beni grad i Wanderluune cho ond ha mech uf de Wäg gmacht. Ech ha fröhlech es Wanderliedli pfeffe ond plötzlech eschs passiert. De Fels onder mer esch fortgrötscht ond ech be drüü Meter bärgab rechtig Tal gheit. Auauau hed das weh do! Met dem Schmärz im Bei hani nömm chönne wiiterloufe. Uiuiui was machi ez?Det zmetzt im Nüüd osse gfend mech doch niemer oder?

Doch plötzlech hani vo wiit wäg öppis ghört : «Emanuele! A Wassa wassa wassa!»

De hedsmer schnöu gschautet. Das send doch mini Frönde vo Grosswange. Si hend de sofort ide Air Zermatt aglüte. Läk du mer hed das gwendet wo dä Heli cho esch. Die nätte Lüüt hend mech de i Heli iglade ond sofort is Unispital Basel brocht.

Mine Frönde vode JuBla hanech för ehri Höuf en Wellnessobe spändiert. Morn gods mer hoffentlech weder besser ond ech cha wiiterreise.

Tageszitat: "Gsechtsmaske, Handpeeling ond Massage. S' Wandere lohnt sech jo                        rechtig!" 5/6 Kl. Mädchen

              "Der Weg ist das Ziel"  Kurt Zemp

Hallihallo ech be weder do, üche Globi!

Nochdem ech jo geschter mine Onfall gha ha eschs mer höt Morge scho vöu besser gange. Trotzdem hani mis Bei nochli mösse schoone, es esch ou emmerno ganz blau. Drom han ech de ganz Morge met mine Frönde us de JuBla ahgluegt was mer muess i Notfallsituatione mache. Mer cha jo schliesslech nie gnueg vorbereitet sii of so öppis oder?

Do’s mer emmernoni so guet goht hani denkt ech probier mol öpis neus met mine JuBla-Boys. Zäme hemer es lässig Lied gsonge ond dezue eis tänzlet. Üsi JuBla-Girls hend deför ih dere Ziit so rechtig chönne d’Sou useloh ond go dräcke.

Jesses ou! Ech has Gsecht vo dene so rechtig mösse sueche onderem Schlamm, du aber es söu jo gsond sie, oder?

Wo mer am Obe hend welle d’Disco starte, hemer doch prompt en Stromusfall gha. Somit send mer uf d’Suechi noch de verlorene Brönnstäb gange. Well die so guet glüchtet hend hemer sie au ich de Nacht im donkle zom Glöck no guet gfonde. Die Strahlige send jo ned so schlemm denki mou, oder was meinsch?

Müed ond beruhigt, dass mer weder Strom hend, semer de alli zäme weder go schlofe.

Tageszitat: "Mini Finger lüchte immernoh, muess das so Globi?" 5/6 Kl. Mädchen

Morge metenand im schöne Schwiizerland. De Globi meldet sech weder.

Höt bim Z’Morgetesch hani es glatts Telefon öbercho. De Chef vom FC Servette esch so froh gseh dass är weder gnueg Strom hed förs Stadion das er doch grad mech ond di ganz JuBlaschaar is Stade de Genève ihglade hed. Das hani aso schono Flott gfonde!

Natürlech hed das herrvoragend zo üsem Reiseplan passt ond drom hemmer üs ou grad ofe Wäg i Kanton Gänf gmacht. Chum acho hends üs i Fuessballtrikots gsteckt ond hend es Training gstartet. Schiinbar send so vell Speler bim Club verletzt das mer ehne müend ushälfe.

Nochem sportleche Training eschs no zom theoretische Teil cho. Schliesslech cha jo ned eifach jede vörne Club go spele wenn er ke Ahnig öber d’Gschecht vom Verein hed. De Sportchef ond de Trainer vom FC Servette hend zom Schloss alli frösch trainierte Clubawärter nomou kritisch onder d’Lupe gno.

Z’legscht hemmer doch tatsächlech üsi wohlverdienti Disco no chönne dörefüere. Juudiihuii esch das lässig gseh!

Tageszitat: "Ech ha ned emol gwösst, dass Servette en Fussballclub sött sie!" 

              3/4 Kl.Mädchen